Монгол Улсын Засгийн газар болон НҮБ-ын хамтарсан удирдах хорооны хуралдаан боллоо

Хуралдаанаар 2017-2022 онуудад Монгол Улсад хэрэгжүүлсэн “НҮБ-ын Хөгжлийн тусламжийн хүрээ” баримт бичгийн үр дүнг дүгнэн хэлэлцэж, уг баримт бичгийг дуусгавар болголоо.

Өнгөрсөн зургаан жилийн хугацаанд хэрэгжүүлсэн хөгжлийн хөтөлбөрүүд нь Засгийн газрын үйл ажиллагааны хөтөлбөр, “Алсын хараа-2050”  зэрэг хөгжлийн бодлогын баримт бичгийн хэрэгжилтэд дэмжлэг болсны зэрэгцээ тогтвортой хөгжлийн зорилгод оруулах үндэсний хувь нэмрийг нэмэгдүүлэх, олон улсын хамтын нийгэмлэгийн өмнө Монгол Улсын хүлээсэн үүрэг амлалтыг хэрэгжүүлэх, тулгарсан сорилт, бэрхшээлийг даван туулахад чухал дэмжлэг болсон гэж дүгнэв.

Хуралдааны дараагийн хэсэгт Тогтвортой хөгжлийн хамтын ажиллагааны хүрээ” баримт бичигт заасны дагуу ирэх таван жилд хэрэгжүүлэх шинэ стратегийн хамтын ажиллагааны хүрээнд хийх ажлын төлөвлөгөөний төслийг хэлэлцэж батлав.

2023 онд Тогтвортой хөгжлийн зорилгуудын хэрэгжилт дунд үедээ хүрч байгаа бөгөөд ирэх есдүгээр сард Нью-Йорк хотноо ТХЗ-ын дээд хэмжээний чуулга уулзалтад өнөөг хүртэл хүрсэн үр дүнг хэлэлцэх юм. Энэхүү чуулганыг угтан Монгол Улс ТХЗ-ын хэрэгжилтийн талаарх Үндэсний сайн дурын илтгэлээ танилцуулахаар бэлтгэж байна.