Олон улсын ахмадын өдөрт зориулсан НҮБ-ын Ерөнхий нарийн бичгийн даргын илгээлт

Олон улсын ахмадын өдөрт зориулсан НҮБ-ын Ерөнхий нарийн бичгийн даргын илгээлт 

Хүн төрөлхтөн урьд хожид байгаагүйгээр илүү урт насалж байна. 2050 он гэхэд 60 ба түүнээс дээш настай хүмүүсийн тоо 1.2 тэрбумаас 2.1 тэрбум болж өсөж, дэлхийн нийт хүн амын 20 хувийг эзлэх төлөвтэй байна.

Ийнхүү хүн амын насжилт уртассан нь энэ цаг үеийн хамгийн том амжилтуудын нэг бөгөөд энэ дэлхийн олон оронд эрүүл мэндийн тусламж үйлчилгээ сайжирч, нийгмийн хамгаалал бэхжсэний илрэл юм. Улмаар нийгэм, эдийн засгийн хувьд ихээхэн өөрчлөлт авчирч, мөн эрсдэл болон боломжуудыг ч бий болгож байна.

Тийм ч учраас энэ жилийн Олон улсын ахмадын өдрийг «Урт наслалтын эрин үе: Урт наслалтыг дэмжих бодлогыг дахин тодорхойлох нь» гэсэн сэдвийн хүрээнд тэмдэглэж, хүмүүс илүү урт наслах болсон энэ цаг үеийн хэрэгцээ шаардлагад анхаарал хандуулахыг уриалж байна. 

Маш олон хүний хувьд өтөл насандаа амьдралын баталгаагүй байдалд хөгжлөөс хоцорч үлдэх эрсдэлтэй тулгарч байна. Улмаар тэдний сайн сайхан байдал, хүний эрх зөрчигдөхүйц ялгаварлан гадуурхалтад өртөж байна. Харин хөдөлмөр эрхлэлт, тэтгэврээс аваад орон сууцны хангамж, эрүүл мэндийн тусламж үйлчилгээ, насан туршийн боловсрол хүртэлх зөв зохистой бодлогыг дэмжсэнээр хэн ч наснаасаа үл хамааран нийгмийн үйл хэрэгт идэвхтэй оролцох боломжтой нөхцөл бүрдэх юм.

Манай ахмадууд гэр бүл, хамт олон, нийгэмдээ асар чухал үүрэг гүйцэтгэдэг халамжлагч, манлайлагчид юм. Энэ жилийн Олон улсын ахмадын өдрөөр үе үеийнхний эв санааны нэгдлийн төлөө хамтдаа зүтгэе! Хүн бүр аюулгүй, нэр хүндтэй, сонголт хийх боломжтойгоор амьдрах таатай нөхцөлд урт удаан наслах ээлтэй бодлогыг бий болгоцгооё!