НҮБ-ын Энх тайвны хонх цохих ёслолын арга хэмжээнд зориулсан НҮБ-ын Ерөнхий нарийн бичгийн даргын илгээлт

Жил бүрийн есдүгээр сарын 21-ний өдрийг дэлхий даяар Олон улсын Энхтайвны өдөр болгон тэмдэглэж, улс орнууд Энхийг хонх цохидог уламжлалтай. Монгол Улс дахь шашин шүтлэг, санваартнуудын төлөөлөл нэгдэн, даян дэлхийн энх тайвны төлөө Сүхбаатарын талбай дахь Энх тайвны хонхыг цохиж, хүн зоны энх амгалан, эв нэгдлийн төлөө залбирал үйлдэж, зул бадраалаа.

Энх тайвны хонх цохих ёслолын эхэнд нь НҮБ-ын Суурин зохицуулагч Яап ван Хиердэн НҮБ-ын Ерөнхий нарийн бичгийн даргын эл өдөрт зориулсан илгээлтийг уншиж, сонордууллаа.

НҮБ-ын Энх тайвны хонх цохих ёслолд НҮБ-ын Ерөнхий нарийнбичгийн даргын хэлсэн үгийг бүрэн эхээр нь хүлээн авна уу.

--- *--- 

Жил бүр Энх тайвны хонхны дуу бидэнд нэн чухал бөгөөд ихээхэн үр дагавар бүхий үйл хэргийг сануулдаг.

Энэ бол Энх тайвныг цогцлоох үйлс юм.

Энх тайван бол зүгээр суугаад хүрдэг үр дүн биш.

Энх тайван бол шаргуу хичээл зүтгэл шаарддаг.

Энх тайван бол бодит үйлдэл юм.

Гэвч өнөөгийн дэлхий ертөнцөд энхийн төлөөх үйлс саарч,

Хүчирхийлэл, хуваагдал нь дэлхий нийтийг талцуулж байна.

Мөргөлдөөн улам бүр тэлж, гүнзгийрч байна.

Үүний улмаас хүмүүс ч зовлон шаналалд өртөж байна.

Шийдэлд хүрэхүйц яриа хэлэлцээ, эв нэгдэл дутагдаж байна.

Төр улсууд энхийг тогтоохгүй нөхцөлд түмэн олон өөр замыг зааж байна.

Дэлхий дахинаа сайн дурынхан, иргэний нийгмийн төлөөллүүд, энхийг сахиулагчид энх тайвны төлөө хамгийн хүнд, чухал ажлыг нугалж байна.

Тэд дуу хоолойгоо өргөж,

Хагарал бутралыг арилгаж,

Олон түмний дунд үүссэн ан цавыг анагааж байна.

Томоос жижиг хүртэлх тэдний бүхий л үйлдлүүд нь Энх тайвны олон улсын өдрийн "Хүн бүрийн төлөө, газар сайгүй, цаг ямагт – Энхийн төлөө хөрөнгө оруулцгаая" хэмээх уриаг бодит үйл хэрэг болгож байна.

Дэлхийн удирдагчид НҮБ-д хуран цуглах энэ чухал цаг үед энхийн төлөөх эдгээр зүтгэлтнүүдээс үлгэр жишээ авцгаая. 

Тогтвортой хөгжилд, ялангуяа эрүүл мэнд, боловсрол, хоол тэжээл, нийгмийн хамгаалалд хөрөнгө оруулж,

Иргэдийн итгэлийг даахуйц институц, тогтолцоог бүрдүүлж,

Хүн бүрийн эрхэм чанар, хүний ​​эрхийг хамгаалж,

Дипломат ажиллагаа, яриа хэлэлцээ хийх, энхийг сахиулах зэрэг энхийн төлөөх арга хэрэгслүүдийг сайтар ашиглан

Аливаа дайн, мөргөлдөөнийг зогсооцгооё. Яг одоо.

Өнөөдөр дэлхийн удирдагчдыг бидэнтэй нэгдэхийг би уриалж байна:

Бодит алхам хийцгээж,

Шийдэлд хүрэхүйц хөрөнгө оруулан,

Бат бөх, тогтвортой энх тайвныг цогцлооход хичээл зүтгэл гаргацгаая.

Энэ бол миний хувьд Энх тайвны хонхыг цохиж буй сүүлийн жил юм.

Гэвч дэлхий дахинаа энхийн төлөө тэмцэгчидтэй үргэлж хамт байх болно.

Баярлалаа.

Антонио Гутерриш

2026 оны 9-р сарын 9-ний өдөр